Psalms 118

A niaring na pite varpa ure ra niuvia

1Avat a pite pa ra Luluai, tago a tena varmari;
Tago kana varmari i tur pa na mutu.
2Boina ba Israel na biti gori,
Ba kana varmari i tur pa na mutu.
3Boina ba gori ra tarai Aron na biti,
Ba kana varmari i tur pa na mutu.
4Boina ba diat dia ru ra Luluai diat a biti gori,
Ba kana varmari i tur pa na mutu.

5Ba iau ga ki na malari, iau ga kail tadav ra Luluai;
Ra Luluai i ga torom tagu, ma i ga valangalanga iau.
6Ra Luluai i tur maravut iau; pa ina burut;
A tarai diat a vakaina davatane iau?
7Ra Luluai i tur na maramaravut piragu,
Kari ina gugu ka ure diat dia milmilikuane iau.
8I boina ba da rivarivan pire ra Luluai,
Ma koko da nurnur ta ra tarai.
9I boina ba da rivarivan pire ra Luluai,
Ma koko da nurnur ta ra umana ngalangala.

10A umana Tematana par dia ga kobot upi iau;
Ta ra iang i ra Luluai ina ubu vue diat.
11Dia ga kobot upi iau; maia, dia ga kobot upi iau;
Ta ra iang i ra Luluai ina ubu vue diat.
12Dia ga vartakalat bat iau da ra umana livur;
Da ga pun diat da ra neap;
Ta ra iang i ra Luluai ina ubu vue diat.
13Di ga varur vadekdek iau upi ina bura.
Ma ra Luluai iat i ga maravut iau.
14Ra Luluai ra dekdekigu ma kaugu kakailai;
Ma ia bula kaugu valavalaun.

15A kalukal ma ra valavalaun dir tur ta ra kuba i ra umana tena takodo;
A lime tuna ra Luluai i uvuvia.
16A lime tuna ra Luluai i ngala;
A lime tuna ra Luluai i uvuvia.
17Pa ina virua, ina laun uka,
Ma ina varvarvai ta ra lavur papalum kai ra Luluai.
18Ra Luluai i tar vaminana iau ma ra virit,
Ma pa i ga vung vue iau upi ina mat.
19Una papa are ra matakilalat na mangamangana takodo tagu;
Ina olo tana, ma ina pite pa ra Luluai:

20Go ia ra matakilalat kai ra Luluai;
A umana tena takodo diat a olo tana.

21Ina pite pa u, tago u ga torom tagu,
Ma u tar valaun iau.
22Nam ra vat ba ra umana tena pait pal dia ga pilak vue,
Nam muka di tar pait ra ul a ngu na pal me.
23Go ra Luluai i vuna tana;
Ma ra mata i dat i manamanane.
24Ra Luluai i vuna ta go ra bung,
Dat a gugu ma dat a ga tana.
25Luluai, ave aring u ba una valaun avet gori;
Luluai, ave lul u ba una vadoane avet gori.

26Nina i olo ma ra iang i ra Luluai i ti doan;
Ave tata vadoane avat ta ra kuba i ra Luluai.
27Ra Luluai ia God, ma i tar tul tar ra kapa ta dat;
Avat a tur pa ra lukara ma ra purpur,
Ma na tuk tar ta ra ram u ra uguugu na vartabar.
28U kaugu God, ma ina pite pa u,
U kaugu God, ma ina pite vangala pa u.
Avat a tul tar ra pite varpa tadav ra Luluai, tago a tena varmari,
Tago kana varmari i tur pa na mutu.
29